أجمل ضحكة
وأجمل ضحكة أكيد ضحكتها الطالة من الوجه الفتان
أنا بطمن لما بشوفها وساعتها بشعر بأمان
وأما بتبعد عنى صورتها برجع أحس انا بحرمان
لو تعرف قيمة غلوتها فى قلبى هتنده ليا اوام
وحبى يكون جوه فى مهجتها وتبعد عن قلبى الأحزان
وقت ما بشتاق ليها بغنى وبقول اسمها جوه ديوان
واسئل نفسى هتعرف أمتى باللى فى قلبى من الكتمان
انا فى بعادنا بخبى الدمعة واللى فى قلبى من الأشجان
وبقول دايما بكره هتفرج ويحلها ربى المنان
جوه خيالى ملازمانى دايمًا وأنا صاحى أو فى الأحلام
وبفكر ادقدق باب بيتها واقولها انى انا هيمان
ويسمع مين يسمع مش فارقة حتى ولو كان ليها جيران
وبصوتى اقول كل مشاعرى المدفونة بقالها زمان
وياهل ترى هتكونى معايا وأشوف أجمل ضحكة جنان
وأشوف خجلك واجمل بسمة على خدودك لون الرمان
ولا ساعتها هلملم جرحى وادارى انا وشى الخجلان
أنا مش هفكر أيه اللى هيجرى بكره يحلها الرحمان
كل اللى فى بالى دلوقتى ألحن ليها أجمل الحان
وأرسم ليها أنا لوحة جميلة فيها بسمتها لون المرجان
انا فى القصة قليل الحيلة ولا فارس ولا أنا فنان
كل ما بكتب حرف انا ليها يقولى ما كفاياك هزيان
بس انا هفضل انادى وأغنى وعمرى فى يوم ما أكون ندمان
وكفاية أسمع صوت ضحكتها وأجمل بسمة منها تبان
ادخل ودوس ليك وشاركنا برأيك فى بيدج أحلام على الوريق
https://www.facebook.com/5oater
تعليقات
إرسال تعليق