سحابة طيف

ما بين بكره وبين أمسك

خطوط حمرا وجبل أعذار .. 

وحمل كتافك المايلة 

مقابل حلم كان مكار ..

وفكرك ايه يعود تانى !!

زمن فانى قوى و غدار ..

ما بين كل السكك زحمة 

وقلب الخلق مفوش رحمة 

ووسط الناس غريب الدار ..

وتحزن ليه ماهوش فارق 

تقابل خلق بتفارق 

حدودك وسطهم فارق 

ما بين بكره وبين امسك 

دليل إنذار..

وناى مشروخ بيبكيلك 

وغنوة خوف بتشكيلك

هروبك م اللى باقيلك 

بعتلك صك فيه إخطار ..

ما بين يومك وبين أمسك

دليل غربة مع الأحباب 

بنتقابل فى ساعة تمر فى ثوانى

هجرنا بيوت بنبنيها 

كانت يوم فيه بتجمعنا بقينا بعاد ..

وداب الحلم بإيدينا 

وخوف من بكره يمنعنا 

نعدى الصعب وأحنا شباب ..

ما بين بكره وبين امسك 

عيون بتفتت الرحلة 

تغير كل خط السير 

تلف فى دايرة مقفولة 

تضيع اللى كان يحلى ..

ماعدش الجى افراحك عشان تفرح

وضاع الوقت فى براحك بقيت تسرح

وم المجهول بقيت خايف 

وم المعمول بقيت خايف 

ما بين يومك وبين امسك

سحابة طيف معدية

وباب مقفول ومركب غارقة فى الميه

بتتمنى تعود للدار ..