أحلام !!!
احلام مبقتش أصدق الأحلام
وبحس أنها كدبة و أوهام
انا طول عمرى بشوفها فى منام
واصحى من النوم ,عمرها ما تبان
فى ساعتها بحس بجرح كبير
ملهوش ولا دوا وكمان تفسير
وبحس انى انا فى الحلم اسير
وقت ما بتمنى منايا بيطير
عادى وشغال ما ادوق المر
واتمرمغ انا فى تراب الذل
ما الحلم رخيص فى زمن بيضر
محروق الدم , فى قلبى بسر
وقت ما بتكلم الاقى سيوف
تضرب فوق راسى من غير ما تشوف
وكأنى حطام ومريض بالسل
بيقولوا سحابة بتيجى وتمر
اسكت احسن للشر تجر
عالم راضية ومالهاش احلام
عايشة بتصحى وبليل بتنام
مش فارقة معاها اى كلام
مبقتش اصدق الأحلام
احلم ازاى ده الحلم مهان
نفسى اصحى الاقى الناس بتفوق
تحلم تتمنى , تشيل الخوف
انا عارف انى خلاص مليت
والزرعة الطارحة ماتت فى الغيط
الدنيا بتقفل نورها شوية شوية
والخير بتقل بركته فى لحظة وثانية
بس انا مقدرش انخ واطاطى واسلم
انا نفسى اصرخ وبعلو الصوت اتكلم
الحلم حقيقة وبكره تشوفه و تتعلم
بس انا خايف اطلع مجنون وبهاتى
وكأنى بكلم صخرة ماليها حواسى
انا حاسس من جوايا بشى مجهول
ان الضلمة هيكون فى اخرها النور
وبرغم قناعتى ان الاحلام بتزول
برجع لسريرى واعيش الحلم
تعليقات
إرسال تعليق