شريط ماضى
عن الشلة اللى واحشانى
عن الصحبة اللى ياما كتير
شالت بأيديها احزانى
وعن قعدتنا فوق السُطح
تسالى وسهرة كت للصُبح
عن الفرحة بجون فيفا
وعن ضحكة وحجر شيشا
واول شدة لسجارة
ولعب الكورة فى الحارة
--------
عن الذكرى اللى سايبانى
ولا بقدر فى يوم اسيبها
عن اللهفة لسماع ستى
وهى بتحكى حواديتها
عن الشخطة اللى من امى
وانا عامل فيها نايم
عن الدمعة اللى بتزورها
وابويا فى السما دايم
عن الضحكة اللى سارقاها
تصبر بيها ايامها
عن الفرحة اللى حايشاها
تشوف احلامنا احلامها
انا واخويا شقاها العمر
هنفضل تحت اقدامها
----------------
عن العيلة وعن الخالة والخال
وعن ايام عاشت بينا
واحساسنا عال العال
كيان كله كيان واحد
بيفرحوا وقت ما بتفرح
واحزانك بأيدهم سهل تنشال
عن العيلة اللى مهما ابقى متغرب
بتبقى اغلى مـ المال
-------------------
وعن ايام طفولة فاتت
وإحساسى انها ماتت
بتيجى سعات على بالى
بلاقى دمعى على خدى
بينزف رأفة على حالى
------------
وعن بوجى وعالم سمسم
وغنوة تقول انا الفرخة :)
ومبحبش أزأز لب :)
انا عندى اقرا مجلة
او ارسم زى ما حب :)
وعن فطوطة وشرابه
وعموا فؤاد وهزاره
وعن بقلز وماما نجوى
وعن حدوتة على القهوة
وعن سنبل وبابا ونيس
وعن ابو زيد والدراويش
وعن شريهان وفوازيرها
وماما سامية ودبديبو
ولو ما اعرفش ؟ ( فاعروستى ) ؟؟
-----------
ولعب البلى والبوكيمون
وبنك الحظ والزهرة
ولعب الدومينوا والطاولة
وعن كاعبول وعبقرينو
وكابتن ماجد ودولفينو
وماوكلى وطنه فى الغابة
والفيل بابار ومازنجر
وتوم والقط وخناقة
------------
وسوبر ماريو فى اتارى
وفرحى بالرخيص شارى
واكتر حاجة بتخوف
كتابت الواجب السارى
-----------
وعن سنة كنت فيها بجد
بذاكر تحت قنديلى
وبستنى الساعات تتعد
وتيجى سابعة تناديلى
نجوم أف ام
وساعة اغانى على زوقك
هتسمعها وتدعيلى
------------
وعن الصدمة الدارجة
نتيجة تالتة مش ولا بد
تلاعب غش فى الدرجة
انا مظلوم اكيد ولا بد
وفى الاخر بنستسلم
وتمشى الدنيا على كفها
عشان تسبق لا بد تمد
----------
وعن الصدمة التانية
قبول درجاتى فى التنسيق
وانا فى الدرجة التانية
تجارة , حقوق , زراعة , اداب
يا حوستى خلاص حلمى اهو داب
ولازم اكون معاه كداب
واحب حجات ماليها تانية
--------------
وعن اول مشاعر حب
واول مره قلبى يطب
واول كلمة كت منى
واول رسمة للننى
واول مرة اكتب شعر
واحاول وياها اغنى
----------
وعن حواديت كتيرة ياما
تجارب فى الحياه مرت
وكل سؤال وليه علامة :(
ماحدش فينا كان معصوم
ماحدش مانجرحش ف يوم
لكن الجرح يوم ورا يوم
يدوب زى اللى دابوا ياما
-----------
تفوت ايام تمر سنين
ويرجع بيا شوق وحنين
لأجمل ذكريات عدت
لأجدع شلة فى صحابى
لأول حب فى الماضى
لأول درس بيه اتعلمت
مافيش مانع اعيش الحلم
وباللى فى ايدى اكون راضى
ادخل ودوس ليك وشاركنا برأيك فى بيدج أحلام على الورق
تعليقات
إرسال تعليق